Më 29 shtator 2022, Ministri i Punëve të Jashtme i Republikës së Çekisë, Jan Lipavský, zhvilloi një vizitë pune në Republikën e Kosovës. Së bashku me të Prishtinën e vizituan edhe anëtarët e Komisionit për Punë të Jashtme të Dhomës së Deputetëve të Parlamentit të Çekisë: kryetari i komisionit Marek Ženíšek, nënkryetari i tij Petr Beitl dhe deputeti Hayato Okamura. Ministri Lipavský vizitoi Kosovën si ministër i Punëve të Jashtme të vendit që aktualisht kryeson Këshillin e BE-së. Negociatat kryesore janë zhvilluar me zëvendëskryeministrin e parë për Integrime Evropiane, Zhvillim dhe Dialog, Besnik Bislimi. Ministri u prit nga presidentja e Kosovës, Vjosa Osmani-Sadriu, dhe kryeministri Albin Kurti. Ministri diskutoi me përfaqësuesit e Kosovës, në veçanti, perspektivën e integrimit evropian të Kosovës, liberalizimin e vizave, dialogun ndërmjet Prishtinës dhe Beogradit dhe energjetikën. Pjesë e vizitës së tij, në Kosovë, ishte edhe një takim joformal me përfaqësues të rinisë kosovare. Deputetët çek kanë biseduar me homologët e tyre kosovarë – anëtarë të Komisionit për Punë të Jashtme dhe Komisionit për Integrime Evropiane, ndërsa janë pritur edhe nga kryetari i Kuvendit të Republikës së Kosovës, Glauk Konjufca.