Takimet e tij me zëvendëskryeministrin e parë për integrime evropiane, zhvillim dhe dialog, Besnik Bislimi, dhe zëvendësministrin e punëve të jashtme dhe diasporës, Kreshnik Ahmeti, konfirmuan nivelin e lartë të bashkëpunimit dypalësh, ndërmjet Çekisë dhe Kosovës, në një sërë fushash dhe interesimin për thellimin e mëtejshëm të bashkëpunimit ekonomik. Ata diskutuan, gjithashtu, pritshmëritë e presidencës së ardhshme çeke në Këshillin e BE-së. Gjatë takimit me nënkryetarin e Kuvendit të Republikës së Kosovës, Enver Hoxhaj, u diskutua veçanërisht për efektet e mundshme, të luftës së Ukrainës, në rajonin e Ballkanit Perëndimor dhe perspektivat e marrëdhënieve ndërmjet Kosovës dhe Serbisë. Zëvendësministri Martin Dvořák u takua edhe me komandantin e misionit paqeruajtës ndërkombëtar të NATO-s në Kosovë (KFOR), gjeneralmajorin Ferenc Kajári, dhe pjesëtarët e njësisë çeke në KFOR. Ai, gjithashtu u takua me ambasadorin e OSBE-së, Michael Davenport dhe zëvendës udhëheqësin e misionit të zbatimit të ligjit të Bashkimit Evropian në Kosovë (EULEX), Cezary Luba. Zëvendësministri Martin Dvořák ka vizituar edhe Istogun – qytet në pjesën perëndimore të Kosovës – ku ka punuar si administrator i misionit të OKB-së, nga viti 1999 deri në vitin 2002, dhe i të cilit është qytetar nderi. Në Istog ai u prit ngrohtësisht nga kryetari Ilir Ferati, kryetari i Kuvendit të Komunës Enver Rugova, ish-bashkëpunëtorët e tij dhe mori pjesë në mbledhjen ceremoniale të Kuvendit Komunal.