На македонскиот фестивал на креативниот документарен филм „МакеДокс’’ беа прикажани два чешки документарни филма и исто така присуствуваа тројца гости од Република Чешка меѓу кои – режисерот Томаш Елшик, претставник на Чешкиот филмски центар Витеслав Хованец и Ондржеј Каменицки од Институтот за документарен филм, кој што исто така беше дел од жирито на „МакеДокс’’.

Преполната сала аплаудираше на интимниот портрет на светски познатиот чешки режисер Милош Форман во филмот ,,Форман наспроти Форман“ режија Хелена Тржештикова и Јакуб Хејна. Позитивен голем одзив имаше приказната за главната и најголемата автобуска станица во Тел Авив и светот во филмот ,,Главна автобуска станица“ што лично го претстави режисерот Томаш Елшик и по проекцијата одговори на сите прашања од публиката.