Në fjalën e tij përshëndetëse, Ambasadori Urban falenderoi të gjithë të pranishmit për bashkëpunimin gjatë muajve të Presidencës. Ambasadori, mes të tjerave, theksoi rolin udhëheqës të Çekisë brenda BE-së në dritën e ngjarjeve të reja gjeopolitike, duke vënë në dukje se agresioni rus ndaj Ukrainës ndikoi në prioritetet e Presidencës. Në të njëjtën kohë, ai përmendi hapat në agjendën e zgjerimit, të cilat BE-ja i ndërmori gjatë Presidencës Çeke (si hapja e negociatave me Shqipërinë dhe Maqedoninë e Veriut në korrik, Forumi Ministror BE-Ballkani Perëndimor për Drejtësinë dhe Çështjet e Brendshme në nëntor, dhe së fundmi, Samiti i suksesshëm BE – Ballkani Perëndimor mbajtur në Tiranë në dhjetor).

Pjesë e Pritjes ishte edhe performanca e nxënësve të talentuar të “Institutit Maria Ndihmëtare, QAFS” Shkodër, të cilët ndezën atmosferën me kërcimet dhe këngët e tyre të gëzueshme. Përveç valleve dhe këngëve tradicionale shqiptare, ata interpretuan edhe këngët e njohura të Krishtlindjeve në gjuhë të ndryshme, përfshirë edhe çekishten.